Reglamento di Privasidat
Na nos ofisina di dòkter di kas nos por prosesá vários dato personal di bo. Esaki ta nesesario pa por duna bo un bon tratamentu médiko i pa e atendementu finansiero di bo tratamentu. Banda di esei prosesamentu di dato por ta nesesario pa, por ehèmpel, kombatimentu di un peliger serio pa bo salú òf pa kumpli ku un obligashon legal (por ehèmpel e obligashon pa mèldu un enfermedat kontagioso a base di e lei di salubridat públiko).
Obligashonnan di nos ofisina
Bonaire Medisch Centrum ta responsabel pa prosesamentu di datonan personal ku ta tuma lugá na e ofisina. Esaki nos ofisina ta hasi komo lo siguiente:
- Nos ta kolekshoná bo datonan pa metanan spesífiko:
- Pa dunamentu di kuido;
- Pa un atministrashon i maneho efektivo;
- Pa duna sosten na investigashon sientífiko, enseñansa i dunamentu di informashon.
- En prinsipio no tin prosesamentu ta tuma lugá pa otro tipo di meta.
- Nos ta pone bo na altura di e echo ku nos ta prosesá dato personal di bo. Esaki por sosodé mediante bo dunadó di kuido médiko, pero tambe via un foyeto òf via nos wèpsait.
- Tur empleado dentro di Bonaire Medisch Centrum a tuma komo obligashon pa anda na un manera konfidensial ku bo datonan personal.
- Bo datonan personal ta bon sigurá kontra akseso no-outorisá.
- No ta warda bo datonan personal mas tantu tempu ku ta nesesario pa un bon dunamentu di kuido médiko.
Pa warda dato médiko e término ta en prinsipio 15 aña (desde bo último tratamentu), a ménos ku wardamentu mas largu ta nesesario, por ehèmpel pa bo propio salú òf salú di bo yunan. Esaki ta keda na evaluashon di e profeshonal ku ta duna tratamentu.
Bo derechonan komo pashènt:
Bo tin e siguiente derechonan:
- E derecho pa sa si bo datonan personal, i kua di nan, ta keda prosesá.
- E derecho pa mira i haña kopia di e datonan ei (te asina leu ku pa motibu di esaki privasidat di un otro persona no ta keda perhudiká).
- E derecho pa koregí, komplementá òf eliminá datonan den kaso ku esei por ta nesesario.
- E derecho pa hasi petishon pa destrukshon (parsial) di bo datonan médiko. Por kumpli ku esaki solamente si wardamentu di e datonan no ta di importansia signikativo pa un otro persona i si e datonan no mester keda wardá a base di un areglo legal.
- E derecho pa agregá un deklarashon propio (di índole médiko) na bo fail.
- E derecho pa den sierto kasonan oponé kontra prosesamentu di bo datonan.
Den kaso ku bo ke hasi uso di bo derechonan, e ora ei bo por duna esaki di konosé oralmente òf pa medio di un email pa info@bonairemedischcentrum.com. Un representante tambe por atendé ku bo interesnan (manera un apoderado por eskrito, òf bo kurátòr òf mèntòr).
Hóbennan for di 16 aña ku ke mira òf haña un kopia di nan fail médiko, mester hasi e petishon nan mes.
Dunamentu di bo datonan personal na terseranan
Empleadonan di Bonaire Medisch Centrum tin e obligashon pa anda na un manera konfidensial ku bo datonan personal. Esaki ta enserá por ehèmpel ku e dunadó di kuido médiko mester di bo pèrmit eksplísito pa por duna bo datonan personal na otronan. Sinembargo riba e regla akí tin algun eksepshon. A base di un instrukshon legal por kibra e obligashon pa keda ketu di e dunadó di kuido médiko, pero tambe na momentu ku mester teme pa un peliger serio pa bo salú òf di un otro persona. Ademas, si ta nesesario, datonan registrá por keda interkambiá oralmente, por eskrito òf digitalmente ku otro dunadónan di kuido médiko (por ehèmpel e botikario ku ta prosesá un resèpt i di e manera ei ta haña datonan for di e dòkter ku ta duna bo tratamentu).
Interkambio di dato
Bonaire Medisch Centrum ta interkambiá datonan médiko relevante ku ‘huisartsenpost’ (hap). Si den anochi òf den wikènt bo tabata na e huisartsenpost (hap), e ora ei esaki na su turno ta kompartí un mensahe di remplaso ku ofisina di bo dòkter di kas. Asina bo dòkter di kas sa kua ta e kehonan ku bo a akudí kuné na huisartsenpost i ki tipo di tratamentu nan a duna bo.
Informashon tokante e remedinan ku bo ta usa tambe por keda kompartí ku bo botika i e spesialistanan médiko ku ta duna bo tratamentu. Ta trata akí di remedi ku bo dòkter di kas a preskribí pa bo, pero tambe eventual intoleransianan, kontra-indikashonnan i alergianan. Otro profeshonalnan ku ta preskribí remedi i dunadónan di remedi por tene kuenta ku esaki. Di e manera akí nos komo ofisina di dòkter di kas ta kontribuí na siguridat di remedi.
Den kaso ku bo no ke pa interkambiá datonan ku huisartsenpost, botika òf e spesialistanan médiko ku ta duna bo tratamentu, e ora ei bo por hasi opheshon kontra esaki via info@bonairemedischcentrum.com.
